Masterclassa eta Topaketa
Gabriela Rendónen Klase Magistrala eta Biotik Design Printzipioen Baterako Sorkuntza
Kokapena
Hizlariak
Gabriela Rendón Nueva Yorken bizi den arkitekto, ikertzaile eta hiri-planifikatzaile mexikarra da. Bere lanaren xedea, betiere Hirirako Eskubidearen ikuspegitik abiatuta, hiria eta etxebizitza berregituratzeko eta garatzeko politikak, programak eta tresna publikoak aztertu, garatu eta ezartzea da. Rendón Urban Front eta Cohabitation Strategies ekimenen sortzaileetako bat da, eta hainbat proiektuen buru izan da Europa, Ipar Amerika eta Latinoamerikako hirietan. Gaur egun Hiri Plangintzako eta Garapen Komunitarioko irakasle elkartua da, eta Nueva Yorkeko Parsons School of Designen Housing Justice Lab-eko zuzendari-sortzailea da. Bere lana Veneziako Biurtekoko Nazioarteko 17. Arkitektura Erakusketan, Arte Modernoko Museoan, San Diegoko Arte Garaikideko Museoan, Portugalgo 2016ko Hirurtekoan, Vienako 2015eko Biurtekoan, Istanbulgo 2012ko Diseinu-Biurtekoan eta Rotterdamgo Nazioarteko 4. Arkitektura Biurtekoan erakutsi da.
Pez Estudio BBDW24eko emakume arkitekto komisarioen taldea da. 2006tik diseinuko, arkitekturako, hirigintzako eta ikerketa-ekintzako proiektuak garatzen dituzte ikuspegi ekologiko, parte-hartzaile eta feministarekin. Pertsonek ingurumenean duten eragina minimizatzea, hiri inklusiboagoak eta genero-ikuspegia dutenak garatzea, sistema biologikoak eta material naturalak erabiltzea eta lankidetza-testuinguruak sortzea sustatzen dute.
Besteak beste nazioartean Arquia Próxima, Karibeko Arkitektura Biurtekoa, Santo Domingoko Arkitektura Biurtekoa eta Holcim Awards Fundazioaren sariak jaso dituzte. Estudio honen lana nazioarteko hainbat erakunde eta programatan garatu da, hala nola Veneziako Arkitektura Biurtekoan, Nueva Yorkeko MoMAn, Shenzhengo Arkitektura Biurtekoan, Medialab-Pradon eta Madrilgo Intermediae Mataderon.
Elisa de los Reyes García arkitektoa eta Pez Estudioren, Bilboko Wikitoki Elkarlaneko Praktiken laborategiaren eta Inteligencias Colectivas/Zoohaus proiektuaren sortzaileetako bat da. Irakaslea da IED Kunsthalen Aldaketarako Diseinu Masterrean eta hitzaldiak eta workshopak egin ditu Europan eta Amerikan (Parsons The New School NY, MoMA NY, Matadero Madril, Medialab Prado, CCE Liman, Santo Domingon, Txilen, etab.).
Antolatzaileak
Topaketa honek Bizkaiko diseinuaren diziplina guztietako profesionalak biltzen ditu ikaskuntza- eta truke-jardunaldi baterako. Saioa Masterclass inspiratzaile batekin hasiko da, egoitza Nueva Yorken duen Gabriela Rendón arkitekto mexikarraren eskutik; Rendón gizarte-justiziari lotutako proiektu disruptiboengatik aintzatetsia da. Ondoren, BBDW24 ekimenaren komisarioak diren Pez Estudioko kideen eskutik elkarlanerako dinamika garatuko da; dinamika honetan parte-hartzaileek elkarrekin sortuko dute Biotik Designen printzipioen eta imaginarioaren inguruan, lurraldearen diseinu jasangarrirako gomendioak eta aholkuak sortuz. Biltzeko, ideiak partekatzeko eta diseinutik jarduteko modu berriei buruz maila kolektiboan hausnartzeko espazioa.
Gabriela Rendónek Ikuspegi eta Praktika Dekolonial, Plural eta Askatzaileak proposatzen dizkigu. Mundua ulertzeko eta bizitzeko egungo moduei aurre egiten dieten pentsatzeko eta jarduteko moduak aztertzera gonbidatzen gaitu. Diziplinaz gaindiko ikuspegi batetik abiatuta, gizarte-, ekonomia-, hiri- eta ingurumen-justiziaren aldeko eraldaketa kolektiboak sustatzen dituzten ideietan eta praktiketan murgilduko gara.
Masterclassak diseinu-metodologiak eta -estrategiak ezagutzeko gune bat eskaintzen du, gure ikusmoldea eta inguruan jarduteko modua askatzea bilatzen dutenak, kontzientziazioa, hezkuntza politikoa eta aldaketa indibiduala zein kolektiboa sustatuz. Gure praktika profesional eta akademikoen eragina birplanteatzeko aukera bat da, ikuspegi erauzle, diskriminatzaile eta kolonialetatik aldenduz.
Ondoren, Biotik Designen printzipioak Bizkaiko testuinguruari nola aplikatu aztertuko dugu. Dinamika honetan zehar oreka ekologikoarekin, inklusioarekin, lankidetzarekin, ezagutza irekiarekin eta esperimentazioarekin konprometitutako proiektuak diseinatzeko eta inplementatzeko gida moduan jardungo duten oinarrizko printzipio-multzoa sortzeko egingo da lan. Parte-hartzaileek gomendio eta imaginario hauek definitzeko aukera izango dute, lurraldearen beharretara eta ezaugarrietara egokituz, aldi berean tokiko ingurunean duten garrantzia bermatuz.
